Parku Natyror “Bredhi i Sotirës” ndodhet në territorin e Bashkisë Dropull, qarku Gjirokastër dhe përfshin një mozaik të larmishëm mbulesash tokësore, duke përfshirë: pyje (30.95%), shkurre dhe bimësi barishtore (50.32%), sipërfaqe bujqësore dhe heterogjene (8.96%), si dhe zona urbane (2.13%). Para shpalljes park Natyror parku gëzonte statusin e Monumentit të Natyrës.

Parku ndahet në dy nënzona menaxhimi:

• Nënzona Qendrore (56.89% e sipërfaqes), ku zbatohet shkalla më e lartë e mbrojtjes për të ruajtur integritetin ekologjik dhe biodiversitetin e zonës. Në këtë nënzonë lejohen kërkimi shkencor dhe aktivitetet e kufizuara ekoturistike.
• Nënzona e Përdorimit Tradicional dhe Zhvillimit të Qëndrueshëm (43.11%), ku lejohen veprimtari tradicionale të qëndrueshme si shëndetësimi i pyjeve, kultivimi i bimëve mjekësore dhe kullotja, duke respektuar kufizimet për të ruajtur gjendjen natyrore të ekosistemit dhe vlerat e peizazhit.

Parku përfaqëson një zonë të rëndësishme për qëllime edukative, shkencore dhe rekreative, duke kontribuar në ruajtjen e trashëgimisë natyrore të rajonit dhe në zhvillimin e qëndrueshëm të komuniteteve lokale. Administrimi i parkut kryhet nga Administrata Rajonale e Zonave të Mbrojtura, Qarku Gjirokastër.