Parku Natyror “Lugina e Shalës” shtrihet në veri të Shqipërisë, në kufi me Parkun Kombëtar të Alpeve të Shqipërisë. Përfshin një kombinim të ekosistemeve pyjore (42.1%), sipërfaqe me shkurre dhe bimësi barishtore (34.5%), tokë bujqësore të fragmentuar, zona me vegjetacion të pakët dhe një rrjet ujor me ujra të pastra, të domiunuar nga lumi I Shalës. Ky park ka rëndësi të veçantë për ruajtjen e biodiversitetit, duke ofruar habitat për një sërë llojshmëri speciesh dhe mbështet konektivitetin ekologjik në Alpet Shqiptare.

Zona është e organizuar në dy nënzona menaxhimi:

• Nënzona Qendrore (28.7%), me një sipërfaqe prej 3,046.49 ha, ofron mbrojtje të rreptë për habitatet natyrore me vlera të larta ekologjike. Në këtë zonë lejohen vetëm veprimtari kërkimore dhe ekoturistike të kontrolluara.
• Nënzona e Përdorimit Tradicional dhe Zhvillimit të Qëndrueshëm (71.3%), që mbulon 7,572.86 ha, synon të ruajë ekuilibrin midis përdorimit tradicional të tokës (si bujqësia, kullotja dhe mbledhja e bimëve mjekësore) dhe mbrojtjes së funksioneve natyrore të ekosistemit.

Menaxhimi i parkut kryhet nga Administrata Rajonale e Zonave të Mbrojtura, Qarku Shkodër.