Park Kombëtar “ Bredhi i Hotovës – Dangëlli”
VKM Nr.1631,datë 17.12.2008, e ndryshuar
Sipërfaqja: 36,003.76 ha

Parku Kombëtar “Bredhi i Hotovës – Dangëlli” është një nga masivet pyjore më të mëdha në Shqipëri, i njohur për biodiversitetin e pasur dhe peizazhin e larmishëm natyror. Zona përfshin një mozaik të ekosistemeve me dominim të pyjeve (54.6%), shkurreve (23.9%), kullotave, tokave bujqësore dhe sipërfaqeve ujore, duke përfaqësuar një ndër zonat me rëndësi të veçantë ekologjike në jug të vendit.

Parku është i ndarë në tre nënzona menaxhimi:

• Nënzona Qendrore (12.65%) mbulon habitatet pyjore më përfaqësuese dhe gëzon mbrojtjen më të lartë ligjore për ruajtjen e trashëgimisë natyrore dhe biodiversitetit. Lejohen vetëm kërkimi shkencor dhe veprimtari ekoturistike të kontrolluara.
• Nënzona e Përdorimit Tradicional dhe Zhvillimit të Qëndrueshëm (87.2%) përfshin pyje, toka bujqësore dhe kullota ku zhvillohen veprimtari tradicionale si bujqësia, kullotja, shëndetësimi i pyjeve dhe mbledhja e bimëve mjekësore e aromatike, në përputhje me integritetin ekologjik të parkut dhe zhvillimin e qëndrueshëm.
• Nënzona e Rekreacionit (0.15%) është e destinuar për turizëm natyror me imapkt të ulët në mjedis dhe shërbime mbështetëse që respektojnë vlerat mjedisore dhe kulturore të parkut.

Parku administrohet nga Administrata e Zonave të Mbrojtura e Qarkut Gjirokastër dhe përfaqëson një aset të çmuar për ruajtjen e biodiversitetit në Shqipëri.