Parku Kombëtar “Mali i Dajtit”

VKM Nr. 402, datë 21.06.2006, e ndryshuar

Sipërfaqja: 28,561.84 ha

Parku Kombëtar “Mali i Dajtit” përfshin një ekosistem të larmishëm natyror dhe kulturor, që shtrihet në një mozaik peizazhesh përbërë nga pyje (43.96%), shkurre dhe bimësi barishtore (26.22%), toka bujqësore e kullota, zona urbane dhe sipërfaqe ujore. Parku ndodhet pranë kryeqytetit dhe përfaqëson një zonë me vlera të larta për biodiversitetin, rekreacionin dhe edukimin mjedisor.

Parku është i ndarë në tre nënzona menaxhimi:

Nënzona Qendrore (34.29%) përfshin habitatet pyjore më përfaqësuese dhe zbatohet mbrojtje e rreptë për ruajtjen e integritetit ekologjik. Lejohet vetëm kërkimi shkencor dhe ekoturizmi i kontrolluar.

Nënzona e Përdorimit Tradicional dhe Zhvillimit të Qëndrueshëm (60.16%) përfshin territore ku zhvillohen veprimtari tradicionale si bujqësia, kullotja dhe grumbullimi i bimëve mjekësore, në përputhje me parimet e ruajtjes së natyrës. Ndërtimet dhe veprimtaritë e tjera lejohen vetëm në përputhje me planet e miratuara zhvillimore që nuk dëmtojnë funksionet ekologjike të parkut.

Nënzona e Rekreacionit (5.54%) është dedikuar turizmit natyror dhe shërbimeve të qëndrueshme, duke respektuar vlerat ekologjike dhe peizazhore të parkut.

Parku administrohet nga Administratat e Zonave të Mbrojtura të qarqeve Tiranë dhe Durrës dhe shërben si një zonë kyçe për lidhjen e qytetit me natyrën, me potencial të lartë për zhvillimin e turizmit të qëndrueshëm dhe ndërgjegjësimin publik.