Park Kombëtar
Lurë – Mali i Dejës
VKM nr. 96, datë 21.11.1966, e ndryshuar
Sipërfaqja: 19,288.88 ha

Parku Kombëtar “Lurë – Mali i Dejës” përfshin një peizazh të pasur malor e pyjor në verilindje të Shqipërisë, me ekosisteme natyrore që përfshijnë pyje (36%), bimësi barishtore dhe shkurre (56%), si dhe zona të hapura me vegjetacion të pakët. I njohur për liqenet akullnajorë dhe vlerat e larta peizazhore, parku përfaqëson një zonë me rëndësi të veçantë për ruajtjen e biodiversitetit dhe habitateve alpine e subalpine. Parku është një nga zonat e mbrojtura më të ndikuara nga aktivitetet njerëzore gjatë periudhës së tranzicionit, duke e bërë menaxhimin e qëndrueshëm të tij një prioritet ekologjik dhe institucional.

Parku shtrihet në territorin e qarkut Dibër dhe ndahet në tre nënzona:

• Nënzona Qendrore (15.1% e sipërfaqes) përfshin 2,919.86 ha dhe siguron mbrojtje të lartë për habitatet natyrore me vlera të rralla. Lejohen vetëm kërkimi shkencor dhe veprimtari ekoturistike të kontrolluara.
• Nënzona e Përdorimit Tradicional dhe Zhvillimit të Qëndrueshëm (83.1%) me një sipërfaqe prej 16,034.29 ha, lejon zhvillimin e qëndrueshëm të aktiviteteve tradicionale si bujqësia, kullotja, grumbullimi i bimëve mjekësore dhe silvikultura, pa cënuar integritetin e ekosistemit.
• Nënzona e Rekreacionit (1.7%) përfshin 334.73 ha dhe synon të ofrojë mundësi për rekreacion të qëndrueshëm në natyrë, shërbime turistike dhe edukim mjedisor, në përputhje me studimet urbanistike të miratuara.

Parku administrohet nga Administrata e Zonave të Mbrojtura, Qarku Dibër.