VKM Nr. 640, datë 21.05.2008, e ndryshuar
Sipërfaqja: 34,507.9 ha

Parku Kombëtar “Shebenik” përfshin një mozaik të larmishwm habitatesh natyrore me vlera të larta ekologjike. Parku karakterizohet kryesisht nga ekosisteme pyjore (47.4%) dhe zona me shkurre dhe bimësi barishtore (40.9%), ndërsa pjesa tjetër përfshin sipërfaqe heterogjene bujqësore, kullota, toka me vegjetacion të pakët dhe zona urbane.

Menaxhimi i parkut është i strukturuar në katër nënzona, të përcaktuara sipas objektivave të ruajtjes dhe shkallës së ndërhyrjes së lejuar:

• Nënzona Qendrore A (6.17%) përfshin habitatet kryesore pyjore dhe të shkurreve dhe administrohet me shkallën më të lartë të mbrojtjes. Kjo zonë synon ruajtjen e integritetit ekologjik dhe të trashëgimisë natyrore, ku lejohen vetëm kërkimi shkencor dhe veprimtari ekoturistike të kontrolluara. Janë të ndaluara prerja e drurëve, përdorimi i kimikateve, kullotja, ndezja e zjarreve, ndërtimet dhe nxjerrja e mineraleve.
• Nënzona Qendrore B (42.2%) ruan një shkallë të lartë natyrshmërie dhe përjashton aktivitete që shkaktojnë ndërhyrje intensive, si: përdorimi i teknologjive të dëmshme për biodiversitetin, shpërndarja e specieve aloktone, ndërtimet infrastrukturore me ndikim të lartë (rrugë, HEC, linja energjetike), si dhe neutralizimi i mbetjeve të jashtme. Menaxhimi synon ruajtjen afatgjatë të funksioneve ekologjike dhe biodiversitetit.
• Nënzona e Përdorimit Tradicional dhe Zhvillimit të Qëndrueshëm (51.2%) administrohet me qëllim mbështetjen e veprimtarive tradicionale si bujqësia, kullotja dhe grumbullimi i bimëve mjekësore, në mënyrë të balancuar me ruajtjen e funksioneve ekologjike dhe pa cenuar strukturën apo funksionin e ekosistemit.
• Nënzona e Rekreacionit (0.41%) menaxhohet për përdorim turistik dhe rekreativ me ndikim të ulët. Lejohen veprimtari natyrore edukative dhe argëtuese që respektojnë funksionet ekologjike dhe karakteristikat natyrore e peizazhore të parkut.

Menaxhimi i integruar i këtyre nënzonave mbështet qëndrueshmërinë ekologjike të territorit, rrit kapacitetin e parkut për të ruajtur speciet dhe habitatet e ndjeshme, dhe forcon lidhjet ekologjike me zona të tjera të Mbrojtura.

Parku menaxhohet nga Administratat Rajonale të Zonave të Mbrojtura të qarqeve Elbasan dhe Dibër.