Park Natyror “Porto Palermo”
VKM Nr. 557, datë 29.07.2022
Sipërfaqja: 1,694.98 ha

Parku Natyror “Porto Palermo” përfaqëson një nga ekosistemet më të veçanta detare & bregdetare në jug të Shqipërisë, i shpallur si zonë e mbrojtur e kategorisë IV me qëllim ruajtjen e biodiversitetit, veçorive të tij gjeomorfologjike dhe vlerave kulturore. Parku mbulon një sipërfaqe prej 1,694.98 ha, nga të cilat 87.9% janë sipërfaqe detare (1,490.4 ha) dhe 12.1% sipërfaqe tokësore (204.58 ha).

Parku ndahet në tre nënzona menaxhimi:

• Nënzona Qendrore (25%) përfshin 424.2 ha (269.21 ha detare dhe 154.98 ha tokësore) dhe përfaqëson zonën me shkallën më të lartë të mbrojtjes, ku dominon natyra e pashqetësuar, me vlera të larta për biodiversitetin, peizazhin natyror e historik. Lejohen vetëm veprimtari kërkimore dhe ekoturizëm i kontrolluar.
• Nënzona e Përdorimit Tradicional dhe Zhvillimit të Qëndrueshëm (74.5%) përfshin 1,263.1 ha (prej tyre 1,221.18 ha detare dhe 41.92 ha tokësore). Kjo zonë ruan funksionet ekologjike ndërsa lejon aktivitete që ndërthuren me zhvillimin e qëndrueshëm dhe përfitimin lokal, në përputhje me objektivat e ruajtjes.
• Nënzona e Rekreacionit (0.48%) me një sipërfaqe prej 7.67 ha, përfshin zona me potencial për edukim mjedisor, veprimtari jomasive rekreative dhe turizëm natyror të qëndrueshëm, duke respektuar integritetin ekologjik dhe kulturor të zonës.

Parku administrohet nga Agjencia Kombëtare e Zonave të Mbrojtura (AKZM) nëpërmjet AdZM Vlorë, në bashkëpunim me Bashkinë Himarë, dhe përfaqëson një hap të rëndësishëm në drejtim të integrimit të zonave bregdetare dhe detare në rrjetin kombëtar të zonave të mbrojtura.